Cazorla: Casillas duhet të largohet nga Reali

Mesfushori i Arsenalit, Santi Cazorla, mendon se Iker Casillas duhet ta braktisë Real Madridin për të kaluar te një skuadër ku do të luajë më shumë. Portieri spanjoll e ka humbur vendin kryesor në portën e Los Blancos që në kohën kur Jose Mourinho ishte trajner, ndërsa bashkëkombësi i tij është ndër ata që i sugjerojnë që të largohet. “Casillas duhet të luajë diku tjetër”, ka deklaruar ish-futbollisti i Villarrealit për beIn Sport. Mesut Ozil është futbollisti që e braktisi Realin për të kaluar në Emirates, ndërsa Cazorla shprehet shumë i kënaqur me bashkëlojtarin e tij. “Mësoj çdo ditë nga Ozil. Është një mundësi e madhe që e kemi atë te Arsenali”, ka shtuar 29-vjeçari.